Вуиз удмуртарня ӵукна. Первосвященникъёс, тӧроос, книга тодӥсьёс но вань Синедрион кенеш люказы. Соос ваизы Кузё-Инмар Иисус Христосэз но нош ик Сое янгыше уськытӥзы кулыны, Ассэ Христос, Инмар Пи каре шуыса.

Куке Иуда тодӥз Иисус Христосэз виыны турттэмзэс, со валаз, шимес уж лэсьтӥз шуыса. Оло нош, со ӧз малпа таӵе янгыше уськытон луоз шуыса, оло нош, малпаз, Иисус Христос быгатоз тушмонъёсызлэсь паймымон амалэн мозмытскыны. Иуда валаз, кытчы вуттӥз сое коньдонэз яратон. Лулыз солэн туж курадӟыса ӧпкелиз. Первосвященникъёс но тӧроос доры мыныса, со берыктӥз куамын серебренниксэс, «сьӧлыкай мон, янгыштэм вирез вузаса» шуыса (мукет сямен вераса, янгыштэм Адямиез кулыны вузай).

Соос нош солы шуизы: «Мар милемлы, ачид учкы (лэсьтэм ужъёсыд понна ачид кыл кут).

Иудалэн ӧз поты гажась-жалясь Инмар азьын бӧрдыса, мур ӧпкелемез. Осконтэм но куашкам мылкыд шобыртӥз солэсь лулзэ. Серебренникъёссэ храме первосвященникъёс азе сэрпалтыса, со потӥз но ошиськиз. Первосвященникъёс нош серебренникъёсты басьтыса, шуизы: «та коньдонэз черке поныны уг яра, та вирлэн дуныз».

Кенешем беразы, та уксёен соос одӥг горшок лэсьтӥсьлэсь пыдйылчиосты ватон музъем басьтӥзы. Со дырысен туннэ нуналозь со музъем (шайвыл) вир музъем шуиське, еврей сямен, Акелдама.

Озьы быдэсмиз Иеремия пророклэн верамез: «басьтӥзы куамын серебренник, Дунъямлэн дуныз, кудзэ дунъязы Израильлэн пиосыз но сётӥзы сое горшок лэсьтӥсьлэн музъемез понна».

#Духовное_просвещение