Калыкез дышетыса, Иисус Христос Вифание вуиз. Со интыяськемын Елеон гурезь сьӧрын, Иерусалимлэсь кыдёкын ик ӧвӧл. Татын Сое ас корказ пыртӥз Марфа нимо кышномурт, кудӥзлэн Лазарь агаез но Мария сузэрез вал.

Лазарьлэн корказ Иисус Христос дышетӥз, лулэз утён сярысь сюлмаськон ваньмызлэсь бадӟым луыны кулэ шуыса. Таӵе вераськон кылдӥз Лазарьлэн сузэръёсыз дорын пумиськон бере. Соос кыкназы ик шумпотыса пумитазы Иисусэз, но туж пӧртэм возьматӥзы со шумпотонзэс.

Мария Иисуслэн пыд азяз пуксьыса, сак кылзӥз Сое.

Марфа со вакытэ трос сюлмаськиз Сое сюдон понна.

Малпаз-а Марфа, огназ уз вуы ваньзэ лэсьтыны шуыса, яке солэн сузэрез Иисус Христосэз туж уг сюлмаськы утялтыны шуыса малпаз, но Марфа лыктӥз Утись доры но шуиз: «Кузё-Инмаре, Тыныд нокыӵе уг поты-а, сузэре монэ огнаме куштӥз шуыса? Вера ук солы, мед юрттоз мыным».

Нош Кузё-Инмар Иисус Христос солы шуиз: «Марфа, Марфа! Тросэз сярысь тон сюлмаськиськод (Марфалэн сюлмаськонъёсыз та дуннеын кулэяськонъёс сярысь гинэ вал), нош тыныд огез гинэ кулэ (Инмар кыллы саклыко луон но Солэсь эриксэ быдэстон). Мария нош ӟеч люкетсэ бырйиз, кудзэ солэсь нокин уз тала.

Мукетаз учыре луиз озьы, Иисус Христос калыкен кенешыкуз, одӥг кышномурт Солэн кылъёсызлэсь шумпотонзэ ватыны быгатытэк, калык пушкысь туж юн черетскиз: «Шудо со анай, кудӥз вордӥз но сюдӥз Тонэ!»

Утись нош та кылъёслы вераз: «Шудоесь Инмар кылэз кылзӥськисьёс но сое быдэсъясьёс», мукет сямен вераса, кинъёс уло Инмарлэсь курон-косонъёссэ быдэсъяса.

#Духовное_просвещение