Иисус Христослэн валтӥсь курон-косонэз — Инмарез но матысьтэ яратон

Адямиос огпол гинэ ӧз юалэ Иисус Христослэсь, кыӵе Солэн валтӥсь дышетонэз, кудӥз пыр усьтӥське Инмар Эксэйлыкын быронтэм улон. Огъёсыз тодэмзы потыса юазы, нош мукетъёсыз — Сое янгыше уськытон понна.

Огпол законэз тодӥсь иудей, Иисус Христосэз эскерыса, юаз Солэсь: «Законын кудӥз курон-косон ваньмызлэсь бадӟымез?»

Иисус Христос солы вераз: «Яраты Кузё-Инмардэ вань сюлмыныд, вань лулыныд, вань визьмыныд но вань кужмыныд. Та нырысетӥез, ваньмызлэсь бадӟым курон-косон. Кыкетӥез, солы укшасез: яраты матысьтэ, астэ ачид кадь ик. Та кык курон-косонъёс вылын сыло вань закон но пророкъёс».

Со возьматэ: ваньмыз, марлы дышетэ Инмарлэн Законэз, мар сярысь веразы пророкъёс, ваньмыз соос пушказы пырто та кык валтӥсь курон-косонъёсты, мукет сямен вераса, законлэн вань курон-косонъёсыз но дышетонъёсыз верало яратон сярысь. Асьмелэн сыӵе яратонмы луысал ке, вань мукет курон-косонъёсты тӥяны ӧм быгатысалмы, уго ваньмыз соос яратон сярысь курон-косонлэн оглюкетъёсыз луо. Кылсярысь, матысьмес яратӥськом ке, сое вӧсь карыны, пӧяны, вийыны, вожъяськыны солы но номыр уродзэ сӥзьыны ум быгатэ, нош дась луом сое жаляны, сюлмаськыны со сярысь но курбон луыны со понна.

Соин ик Иисус Христос шуиз: «Та кык курон-косонъёслэсь мукетыз бадӟымезгес ӧвӧл» (Мрк.12:31).

Законэз тодӥсь Солы шуиз: «Умой, дышетӥсь! Зэмлыкез тон верад, Кузё-Инмардэ вань лулыныд но матысьтэ астэ ачид кадь ик яратон, Инмарлы ваньмызлэсь но бадӟым курбон луэ  шуыса».

Иисус Христос нош солэсь визьнодо верамзэ адӟыса, шуиз: «Кыдёкын ӧвӧл тон Инмар Эксэйлыклэсь».

#Духовное_просвещение

Добавить комментарий

Ваш e-mail не будет опубликован. Обязательные поля помечены *