Хананей ныллэн бурмонэз

Огпол Иисус Христос лыктӥз Тир но Сидон палъёсы. Отын Со доры лыктӥз хананей кышномурт, осконэзъя язычница, но туж зол черекъяны кутскиз: «Жаля монэ, Кузё-Инмар, Давидлэн Пиез! Нылме мынэсьтым шайтан думылӥз!». Дышетскисьёсызлы та кышномуртлэсь юн осконзэ возьматон понна, Иисус Христос одӥг кыл но ӧз вера. Соку дышетскисьёсыз Сое куризы: «Лэзь сое, сьӧрамы черекъяса мынэ ук».

Но Иисус Христос шуиз: «Мон ыстэмын Израиль коркалэн бырись ыжъёсыз доры гинэ».

Со вакытэ кышномурт, йыбыртъяса, Утись доры лыктӥз, пыд азяз усиз но тазьы куриз: «Кузё-Инмар, юртты мыным». Иисус Христос солы шуиз: «Нырысь нылпиослэн кӧтсы мед тыроз, уго умой уз луы соослэсь няньзэс басьтыса, пуныослы куштыны». Озьы Со вераз, еврейёс асьсэды Авраамлэн, Инмарлэн нылпиосыз, Инмысь Эксэйлыклэн пиосыз шуэменызы, нош язычникъёс шоры, пуныос шоры кадь учкеменызы. Соин ик Утись та учырын, юри еврейёсъя кариськыса но та кышномуртэз пуныен ӵошатыса, еврейёслы возьматыны малпаз соослэсь язычникъёс шоры шонертэм учконзэс. Уго язычникъёс пӧлын Со адӟылӥз сыӵе юн осконэз, кудзэ ӧз шедьты еврейёслэсь, «Израиль коркалэн бырем ыжъёсызлэсь». Со сяна, Утись та кылъёсыныз возьматӥз кышномуртлы, Со лэсьтоз ужъёссэ нырысь ик еврейёс пӧлын шуыса, уго соос оскизы зэмос Инмарлы. Нош та кышномуртлэсь оскись сюлэмзэ адӟыса, Утись шумпотыса возьматӥз вань адямиослы, кыӵе луыны кулэ зэмос оскон.

Кышномурт талы зӥбыт вазиз: «Бен, Кузё-Инмаре, но пуныос но сиё кузёоссылэн ӝок вылысьтызы усем нянь пырыоссэ». Та кылъёсыныз хананей кышномурт аслэсьтыз быдӟым зӥбыт-востэмлыксэ, языческой осконын но Инмарлы туж матын луыны быгатонзэ гинэ ӧз возьматы, но нырысь ик мур осконзэ, гажась-жалясь Инмарлэн тырмыт дэлетэз котькуд адями понна шуыса.

Соку Иисус Христос солы шуиз: «О, кышномурт! Осконэд тынад быдӟым! Мед луоз тыныд сюлэм малпамедъя». Соку ик солэн нылыз бурмиз.

Дораз бертэм бераз, кышномурт нылзэ тазаен, валес вылаз шутэтскыса кыллисен шедьтӥз.

#Духовно_просветительская_работа

Добавить комментарий

Ваш e-mail не будет опубликован. Обязательные поля помечены *